Концерт на гимназијата во Гостивар за успех на матурантите и добредојде на полуматурантите

Гостиварската гимназија преку песна ги спои музичките таленти-актуелни и некогашни ученици во училиштето, како и основци, вљубеници во пеењето и свирењето. Концертот што го организираше вечерва се одржа во спортската сала на гимназијата, а на сцената се претставија 15-тина изведувачи.

Настанот беше посветен на гимназијалците кои годинава го завршуваат средното образование, и на деветтоодделенците кои одлучуваат каде ќе продолжат во средно.

„Инспирирани од моќта на музиката, ги сплотивме нашите музички таленти, оние кои се сè уште се наши ученици, оние кои биле наши ученици и оние кои се потенцијални наши ученици, и го организиравме овој концерт на музички таленти. Ова е начин и да им посакаме успешна иднина на матурантите и добредојде на полуматурантите. Музиката го инспирира целиот свет, дава живот и радост на сè што постои. Музиката може да го промени светот, затоа што не познава граници, ги зближува луѓето и ги облагородува.“, беше речено на концертот.

Публиката имаше можност да проследи разновидност на сцената, популарна поп музика, безвременски рок хитови и интересни перформанси во кои младите не се штедеа.