Коронавирусот официјално е глобална здравствена закана

Светската здравствена организација на вчерашниот состанок на Комитетот за итни случаи го прогласи коронавирусот за глобална здравствена закана, а најголемата опасност се гледа во можноста за ширење во земјите со послаб здравствен систем.

„Комитетот смета дека сè уште е можно да се прекине ширењето на вирусот, под услов земјите да воведат силни мерки за рано откривање на болеста, изолирање и лекување на случаите, како и за промоција на мерки за превенција. Важно е да се напомене дека како што ситуацијата продолжува да се развива, така треба да биде и со стратешките цели и мерки за спречување и намалување на ширењето на инфекцијата.“, наведува СЗО.

Најновата информација Кинеската здравствена комисија е дека во Кина од вирусот до сега починале 213 лица, а над 9.600 се заразени. За 24 часа бројот на жртви се зголемил за 43 лица.

Ноќеска италијанските власти објавија дека се регистрирани првите два случаи на коронавирус во Италија и дека земјата ги прекинува сите летови до и од Кина.