Кражби Гостивар: Чувајте си ги парите и златото и од најблиските

За период од девет месеци во гостиварскиот регион се случиле 166 тешки кражби, покажуваат податоците од СВР Тетово. Најголемиот дел од нив биле во куќи и станови, а имало и по некоја низ продавници, на автомобили и друго.

„Најчесто тешките кражби биле извршени со насилно отворање на влезните врати или прозорците во подрумски простории, на приземјата од објектите или со влегување низ незаклучени врати. Најпривлечен плен за крадците и годинава се златен накит и пари, но биле одземани и телевизори, часовници, мобилни телефони, бижутерија. Најмногу од кражбите се случиле во доцните вечерни часови и при отсуство на сопствениците на објектите, а дел од нив биле и во време кога домашните спиеле во други простории, па дури и во истите во кои „оперирале“ крадците“, стои во анализата на полицијата.

Надлежните како карактеристично ја издвојуваат појавата на извесен број тешки кражби, во кои сторители биле најблиски на сопствениците, односно членови на семејството кои најчесто краделе златен накит или пари.

Од почетокот на годината заклучно со септември на поширокото гостиварско подрачје биле регистрирани и кражби на електрична енергија, на велосипеди, на дрва за огрев и друго.