Кризниот штаб Гостивар повика на вакцинација и почитување на мерките

По една година пауза денес во Гостивар повторно се одржа состанок на Кризниот штаб, на кој се разгледуваше состојбата со ковид на подрачјето. Штабот оцени дека ситуацијата е сериозна, но под контрола, упатувајќи апел до граѓаните да се вакцинираат во што поголем број и да ги почитуваат антиковид мерките.

„Ова е вонреден состанок на Кризниот штаб по четвртиот бран на ковид. Прв заклучок е дека состојбата е сериозна, но под контрола. Второ е апел од сите нас до граѓаните на Гостивар да се придружуваат до сите мерки за заштита кои се дадени од надлежните, пред се Комисијата за заразни болести при Министерството за здравство. Трето е апел до граѓаните да се вакцинираат во што поголем број, бидејќи сите научни истражувања потврдуваат дека вакцината, било која, е некаква заштита од зараза и ширење на пандемијата, и дефинитивно влијае врз намалување на смртноста и клиничката слика на пациентите. Оние кои се вакцинирани, ако се заразат,  полесно ја поминуваат болеста и помала е смртноста“, изјави по состанокот градоначалникот на Гостивар, Арбен Таравари.

Како четврти заклучок ја наведе подготвеноста на општината да понуди спортска сала или друга поголема просторија за спроведување на вакцинацијата, доколку има потреба и барање, со оглед на зголемениот интерес последниот период.

Од Здравствениот дом Гостивар на состанокот информираа дека во пунктовите за вакцинација во градот дневно вакцина примаат околу 500 граѓани, а функционираат и пунктовите во селата Врапчише и Чегране.

Директорот на општата болница во Гостивар Јакуп Јакупи информираше дека на одделенијата се хоспитализирани 103 ковид пациенти. Се обезбедуваат дополнителни болнички кревети, установата е снабдена со кислород, а медицинскиот персонал е целосно ставен во служба на ковид болните.

Голем проблем кој го регистрираат надлежните се прекршувањата на решенијата за изолација. Командирот на Полициската станица Гостивар Гази Абдураими даде податок дека месецов полицијата поднела 57 кривични пријави против лица кои не ја почитувале задолжителната изолација.

Подрачјето на општините Гостивар, Врапчиште и Маврово Ростуше има околу 1.467 активно заразени со коронавирус.