Лани во Гостивар 86 невработени лица добиле по 5.000 евра грант за отворање бизниси

Над 350 лица во Гостивар и гостиварско, минатата година се вработиле преку некоја од владините мерки за активно вработување. Надлежните ја оценуваат 2018-та како една од најуспешните години кога е во прашање спроведувањето на ваквите мерки. Од Центарот за вработување велат дека за гостиварци најатрактивна била мерката Самовработувањето со грант, што предвидува грант од 5.000 евра за отворање на сопствен бизнис.

„Сите добија по 5.000 евра неповратни средства, со услов фирмата да продолжи да работи најмалку уште две години. Кај правните субјекти пак, голем интерес имаше за добивање на субвенции за плати. Станува збор за користење на 19.000 денари месечно бруто плата, за секое ново вработување за период од една година, под услов да се задржат лицата на работа 30 месеци. Со оваа мерка се вработија 79 лица“, рече Хисен Амзаи, раководител на Центарот за вработување во Гостивар

Огласите за користење на парични средства за отворање на нови работни места или бизниси за 2019-та година, се очекува да бидат објавени кога ќе се донесе Оперативниот план за вработување. Според најавите, оваа година ќе има зголемување на финансиите за таа намена.

Лани во Гостивар се оствариле и 17 вработувања на инвалидни лица, додека четири невработени биле ангажирани за лични асистенти на лица со посебни потреби.