Локализиран пожарот во НП Маврово, хеликоптерот исфрли над 15 тони вода

Со помош на полициски хеликоптер од Хеликоптерската единица за посебни намени кој исфрлил 15 тони вода локализиран е пожарот во атарот на село Жировница, на територија на НП Маврово.

Одделот за воздухопловни единици на МВР по добиено барање од Центарот за управување со кризи за гасење на пожар во атарот на село Жировница, Општина Маврово-Ростуше, го упати хеликоптерот М171 од Хеликоптерската единица за посебни намени, при што со прецизно дејствување беа исфрлени 15 тони вода. Со тоа пламените јазици беа изгаснати и пожарот беше локализиран, информираат денеска од МВР.

Пожарот е локализиран при што има чадење се уште на одделни места, но, по земја, дејствуваат 5 ренџери од Националниот парк и се очекува дека до крај на денот ќе го локализираат и тој дел, извести ЦУК. Со пожарот била зафатена според првични проценки околу 17 хектари на високопланинска трева, смреки и дел од букова шума.