Маж и жена најдени мртви во возило паднато во Радика

Сопружници биле пронајдени мртви во автомобил, кој бил паднат во реката Радика, покрај патот Маврови Анови-Дебар, кај Скудрињски мост.

Според информаиците кои Gostivarpress.mk ги доби од СВР Тетово, денес во 14 часот и 10 минути било пријавено дека во водите на Радика е забележано патничко моторно возило „југо“ со дебарска регистрација, кое најверојатно излетало од патот.

Набрзо на терен излегле полициски службеници од полициското одделение Ростуше, Дебарската противпожарна единица, а била повикана и Итна помош од Дебар. Екипите го извлекле автомобилот, а во него биле пронајдени две лица без знаци на живот. Утврдено било дека се работи за маж на возраст од 64 години и неговата 60 годишна сопруга од селото Житинани, Општина Центар Жупа.

Од страна на Јавен обвинител и ОВР Гостивар бил извршен комплетен увид, а по наредба на обвинител телата на починатите се предадени на обдукција. Причините и околностите ќе се утврдуваат.