Министерство тврди дека Русино се‘ уште е под надлежност на Општина Гостивар

Владата досега нема одземено ингеренции на ниедна општина во областа на управувањето со отпадот, соопшти Министерството за животна средина. Во нивното соопштение се вели дека моментално Русино е се уште под надлежност на Општина Гостивар и ЈКП Комуналец и дека тие имаат обврска да ја одржуваат и обезбедуваат.

„За Полошкиот регион, беа обезбедени средства за подготовка на Регионален план за управување со отпадот и Стратешка оценка на влијанието врз животната средина. Во согласност со планот, МЖСПП блиску соработува со Швајцарскиот секретаријат за економски прашања (SECO) за инвестирање на 8 милиони евра за изградба на централен објект за управување со отпад – регионална депонија за комунален отпад во Русино, на местото на постоечката нестандардна депонија што ќе ги опслужува граѓаните во сите општини во регионот и изградба на 2 трансфер станици со вкупно инвестициони трошоци од еден милион евра. До започнувањето на функционирањето на јавното регионално претпријатие „ЗЈП Русино/Полог“ и проектните активности за изградба на Русино во стандардна депонија со сите пропратни заштитни мерки согласно законот, обврската за оперирање со постоечката локација во Русино е сè уште надлежност на општина Гостивар и ЈКП Комуналец од Гостивар. Општина Гостивар, преку ЈКП Комуналец од Гостивар има обврска да наплаќа за секој тон депониран отпад кој се одлага на Русино и со тие средства да ја одржува локацијата, со технички услови за заштита на животната средина, спречување на влез на неформални лица, обезбедување од пожари и слично.“, наведуваат од Министерството.

Преку соопштението, Министерство го демантира градоначалникот на Гостивар Арбен Таравари, кој во неколку наврати изјави дека ингеренциите на општината за Русино и се одземени.

Додека локалната и централната власт си ја предаваат топката на одговорност, состојбата на Русино останува алармантна. Депонијата не престанува да гори, граѓаните се гушат во чад, кој особено се чувствува во вечерните часови. На жешкото време, среде лето не можат да отворат прозорци, заради неподносливата смрдеа и загадување.