Објавени новите огласи за поддршка на невработени и фирми кои отвораат работни места

Агенцијата за вработување ги објави новите огласи кои опфаќаат поддршка за регистрирани невработени лица и за фирми кои отвораат нови работни места.

Сите невработени лица кои се евидентирани како активни баратели на работа во Агенцијата кои сакаат да започнат сопствен бизнис, можат да се пријават за учество во Проектот за самовработување со кредитирање. Невработеното лице може да добие кредит од најмалку 5.000 евра до најмногу 10.000 евра, по негов избор како  кредитобарател, а за секое новоотворено работно место дополнително по 5.000 евра, при што ќе се финансираат проекти со најмногу 5 работни места (вклучувајќи го и кредитобарателот), односно до 30.000 евра, независно од тоа дали станува збор за дејност од помал или поголем обем.

Проектот за отворање на нови работни места во правни субјекти (микро, мали и средни претпријатија) кои сакаат да го прошират и развијат сопствениот бизнис преку користење на кредитни средства е наменет за фирми регистрирани најмалку 6 месеци со има најмалку 1 вработено лице на денот на аплицирањето.  Пријава за учество во овој Проект може да достават и невработени лица евидентирани во Агенцијата како активни баратели на работа,  кои не биле во работен однос кај истиот работодавач кој аплицира за учество во проектот најмалку 1 година пред денот на аплицирањето.

Правните субјекти може да добијат кредит во износ од 5.000 евра за секое новоотворено работно место, без ограничување на бројот на лица кои може да ги вработи.

Правниот субјект кој ќе вработи невработено лице со полно работно време, има обврска да го задржи на работа најмалку 3 (три) години од денот на засновање на работниот однос.

Барањата за кредит се поднесуваат во работните клубови на Центрите за вработување секој работен ден од 09:00 до 14:00 часот.