Околу 200 пациенти во Гостивар чекаат за операција на катаракта на очи

Поради административни потешкотии, изведувањето на операциите за отстранување на катаракта (перде) на очите во болницата во Гостивар е во прекин. Овој хируршки зафат, започна да се изведува во гостиварската општа болница минатата година, во соработка со Клиниката за очни болести од Скопје. После десетина успешно извршени операции, се прави пауза, која како што велат надлежните е поради технички потешкотии. Очекуваат проблемите да се надминат во скоро време и да се продолжи со зафатите. На листата на чекање за операција на катаракта има околу 200 пациенти од Гостивар и околината.

„Имавме застој, но планираме да започнеме со нови операции. Пациентите кои се на листа на чекање сакаат да бидат услужени и интервенцијата да се изведе во болницата во Гостивар, за да не мора да патуваат во Скопје“, вели д-р Илјаз Исмаили, директор на Клиника за очни болести

Во гостиварската болница лани беше воведена и ласерска интервенција кај пациенти со дијабетна ретинопатија. За тој медицински третмен секој втор петок во Гостивар доаѓа специјалист од Скопје.

Првите три операции на катаракта на очи во болницата во Гостивар беа извршени  во февруари 2016-та година под водство на стручен тим од Универзитетската клиника за очни болести.