Предновогодишна радост и подароци за малите пациенти на педијатрија во Гостивар и децата во Дневниот центар

Предновогодишните денови за сите луѓе треба да се полни со позитивна енергија, насмевки, дружба, а на тоа најмногу секако се радуваат дечињата.

Со цел да им пренесе барем мигови на празнична атмосфера на децата пациенти на педијатрија во болницата во Гостивар, Здружението “When in Trouble” ги посети заедно со Дедо Мраз, кој како што доликува за Нова година, им подари новогодишни пакетчиња.

Дедо Мраз исто така подели пакетчиња и во Дневниот центар за деца со попреченост.

„Со ваквите активности се трудиме да внесеме барем малку радост во детските срца и да придонесеме за насмевки на лицата на дечињата. Секако, главен лик за Нова година е Дедо Мраз, на кој најмалите најмногу му се радуваат, затоа и го поканивме да ги подели  пакетчињата. На дечињата кои се на лекување во болницата им посакуваме што побргу да оздрават, на сите деца да имаат што повесело и посреќно детство“, рече претседателката на здружението, Билјана Беловинова.

Здружението “When in Trouble” продолжува да ги насочува своите активности кон хуманитарни акции за помош и поддршка на социјално ранливите граѓани, постарите и немоќни лица, децата во ризик итн.