Промотивна Конвенција на ДУИ во Гостивар

 Демократската Унија за Интеграција, попладнево во Гостивар го промовираше кандидатот за градоначалник од своите редови Невзат Бејта и кандидатите на советничката листа со кои ќе ја бара довербата од граѓаните на престојните Локални избори 2017.

Во своето обраќање на Конвенцијата во Центарот за култура, Бејта се осврна на реализираните проекти во изминатиот градоначалнички мандат и на предвидените во новата изборна програма „За Утрешен Гостивар“. „Заедно со мојот тим и со членовите на Советот изминатите четири години реализиравме над 600 проекти: улици, тротоари, канализации, уредување паркови, потоа во областа на спортот, социјалата, образованието, култура кои беа предвидени во победничката програма од 2013 година. Ја бараме поддршката на гостиварци за да направиме уште повеќе – „За Утрешен Гостивар“. Ќе набројам само неколку од проектите кои планираме да ги оствариме. Изградба на нов плоштад, кој ќе го направи Гостивар најубав град во Македонија, изградба на нов мост на Вардар, потоа отворање на слободни економски зони, обезбедување јавен транспорт, отворање на Музеј и Уметничка Галерија, поставување на подземни контејнери со што нашиот град ќе биде уште почист. Тука сакам да го споменам и конечното решавање на проблемот со депонирањето на комуналниот отпад и гарантирам дека Гостивар ќе биде најчист и најеколошки град во Македонија“, потенцираше кандидатот за градоначалник од ДУИ, Невзат Бејта.

Пред присутните свое обраќање имаше и шефот на Изборниот штаб на ДУИ во Гостивар, Башким Хасани кој ги претстави кандидатите од советничката листа со носителот Насир Муслиу.

„ Нашата Програма со која излегуваме на овие избори е создадена според барањата на граѓаните, со многу нови проекти за доброто на Гостивар и гостиварци. Ја бараме поддршката од гласачите како тим којшто реализира тоа што го ветува“, рече носителот на листата Муслиу.

Во својата порака упатена од Конвенцијата на ДУИ во Гостивар лидерот на партијата, Али Ахмети повика на фер кампања без навреди кон противниците. „Ги слушам опонентите од другите политички партии како обвинуваат, навредуваат и сметам дека таа практика не е во ред. Ние не го правиме оа. Ние на изборите излегуваме со енергија, потенцијал и квалитетен кадар подготвен да работи и затоа сум убеден во успех“, порача Ахмети.

На Конвенцијата говореа и кандидатите од советничката листа: Гентијана Бектеши, Алберт Јакупи, Џенета Хусеини и Адис Исмаили.