Се крчка буџетот на општина Гостивар за 2019 година

Предлог буџетот на општина Гостивар за 2019-та, наскоро треба да се најде на дневен ред пред општинскиот Совет. Општинската каса за наредната година е проектирана на околу 16,4 милиони евра. Најголем прилив на средства се очекуваат од дотациите и наплатата на даноци. Во делот на капитални инвестиции, Предлог буџетот содржи инфраструктурни проекти: изградба и реконструкции на улици и патишта, водоводни линии, канализации. За културни манифестации и творештво, предвидени се 1,8 милиони денари, додека за поддршка на спортот 7,2 милиони денари. Општината има намера да го поднови возниот парк, па во буџетот се планирани 1,2 милиони денари за купување возила.

Најважниот финансиски документ на локалната самоуправа, според законските регулативи, треба да биде изгласан до крајот на годинава. Дали политичките судири меѓу локалната власт и мнозинството во Советот, повторно ќе бидат кочничар во донесувањето на буџетот, останува да се види. Лани, Гостивар три месеци беше на мерка времено финансирање, токму од тие причини.

Во наредните денови во општината ќе се организира јавна презентација на Предлог буџетот, на која свои мислења и предлози може да даваат граѓаните, невладините организации и сите заинтересирани.