Спомен обележје на Јосиф Багери ќе се постави во паркот кај Општина Гостивар

Во малиот парк до зградата на локалната самоуправа во Гостивар ќе биде поставено спомен обележје на Јосиф Багери, културен деец, православен Албанец, по потекло од Горна Река. Одлуката беше изгласана на денешната седница на општинскиот Совет, во рамки на  Програмата за одбележување на значајни настани и истакнати личности со спомен-обележја.

„На сите ни е познато кој бил Јосиф Багери и колкаво е значењето на неговото дело.  Спомен обележјето, кое е планирано да се постави во паркот до општината е подарено од донатор“, рече Аслијан Снопче, раководителка на Секторот за образование.

Советникот од ДУИ, Лек Далипи реагираше дека текстот на Програмата не е во соагласност со Уставот и побара да се смени.

„Јас не сум против поставување на споменикот, но сметам дека текстот на Програмата е тенденциозен. Таму, наместо Албанци, стои „дел од албанскиот народ“. Ваква беше реториката пред 2001-ва година, ние не сме „дел“, туку сме Албанци. Ова е пропуст на администрацијата и треба да се смени согласно Уставот.“, рече Лек.

Претседателот на Советот, Валбон Лимани им предложи на советниците точката да се стави на гласање, а дополнително да се извршат промените во тој дел и текстот да се смени како што пишува во Уставот. Одлуката беше донесена со мнозинство гласови. Советниците од СДСМ и ВМРО-ДПМНЕ по оваа точка беа воздржани.

Јосиф Багери, роден 1870 година во Нистрово, Горна Река оженет со Василка Бошкова, се смета за еден од најистакнатите албански културни дејци. Како поет и просветител дејствувал во Софија, Дебар, Скопје, Драч и во Приштина, кадешто починал во 1916 година.