Светска недела на доењето: Мајчиното млеко го штити здравјето на детето со години

Традиционално секоја година, од 1 до 7 август се одбележува Светската недела на доењето, во рамки на која се организираат активности и се спроведуваат кампањи за потенцирање на важноста на доењето. Оваа година, мотото гласи: „Да се поддржат родитeлите за да се овозможи доењето”.

Мајчиното млеко  со исклучителни нутритивните вредности е неопходно за правилен раст, развој и здравјето на бебето, а истовремено е корисно и за физичкото и психичкото здравје на мајката. Затоа, лекарите советуваат да се практикува до едногодишна возраст на детето. Мајчиното млеко е идеално по состав, така што бебешкиот организам го искористува скоро 100%.

Сепак, податоците покажуваат дека до 80% од жените целосно го прекинуваат доењето по 6 месеци и преминуваат на исхрана со адаптирано млеко.

Бенефитите од доењето се бројни. Жените кои ги дојат своите бебиња најмалку 3 месеци, имаат три пати помали шанси во периодот на менопауза да заболат од карцином на јајниците и градите. Исхраната со мајчино млеко во траење од 6 месеци го штити имунолошкиот систем  на детето во наредните 13 години од неговиот живот. Бебињата чии мајки ги доеле најмалку 6 месеци имаат 30% повисок коефициент на интелигенција, затоа што мајчиното млеко содржи материи кои го поттикнуваат развојот на мозокот.