Таравари: 2019-та беше тешка, се надевам дека 2020-та ќе биде година на промени!

Честитајќи ја Новата година на граѓаните со желби за добро здравје и успеси, градоначалникот на Гостивар, Арбен Таравари ја оцени 2019-та како тешка година за локалната власт. За 2020-та, се надева дека ќе биде година на промени.

„Поминавме релативно тешка година, со проблеми во Советот на општината, проблеми од централната власт коишто главно доаѓаа поради тоа што не сме од иста партија, одземање на ингеренции за образование, тенденции да се одземат и во урбанизмот. И покрај пречките, успеавме да направиме повеќе проекти. Во втората половина од годината успеавме да направиме мнозинството во Советот и состојбите некако се релаксираа. Се надевам дека 2020-та ќе биде година на промени во Македонија и дека работите во земјава ќе тргнат како што треба. Нема дилема дека мора да бидеме оптимисти.“, рече градоначалникот.

Тој напомена неколку проекти коишто се планирани да се реализираат во новата година.

„За следната година имаме повеќе проекти. Тука се асфалтирањата на повеќе улици и патишта, изградба на канализации, ете во Чегране веќе се работи, се надеваме дека и ќе започне проектот и во Млаки, потоа водоводни мрежи…Би споменал изградба на затворен базен, за што имаме најава од Владата дека еден од базените ќе биде во Гостивар, потоа две нови градинки, околу десет нови детски игралишта, реновирање во повеќе училишта и други.“,  откри Таравари.

Инаку, градоначалникот рече дека новогодишната ноќ ќе ја помине дома, во кругот на семејството.