Таравари: Локалната економија мора да дише, да се отворат рестораните и кафетериите

Меѓуопштинскиот кризен штаб на општините Гостивар, Врапчиште и Маврово Ростуше во повеќе наврати до сега предлагаше олеснување на рестриктивните мерки за превенција од ширење на коронавирус, особено во делот на скратувањето на забраната за движење и работата на угостителските објекти. Градоначалникот на Општина Гостивар, Арбен Таравари, на вчерашниот состанок нагласи дека треба да се дозволи рестораните и кафетериите да работат за да почнат да закрепнуваат ваквите мали, но значајни локални бизниси.

„Треба да се размисли за скратување на полицискиот час. Ние како меѓуопштински штаб и минатата недела го испративме тој предлог до централниот кризен штаб и сега го повторуваме. Во работни денови полицискиот час да биде од 23 до 5 часот наутро, а за викендите од 21 до 5 часот. Исто така, би ги повикал компетентните институции да дозволат отворање на кафетериите и рестораните. Се разбира, при тоа да се придржуваат до мерките за заштита и протоколите. Локалната економија мора да дише како што треба.“, изјави градоначалникот.