Таравари во посета на Падалиште каде дождовите го оштетија локалниот пат

Обилните врнежи со кои се соочи гостиварскиот регион изминатиот викенд предизвикаа оштетување на локалниот пат кој води до селото Падалиште. Таму денес беше градоначалникот на Гостивар, Арбен Таравари придружуван од свои соработници.

“Невремето го направи своето, но и човечкиот фактор во конкретниов случај влијаел штетите да бидат поизразени. Значи, покрај поројните дождови, ситуацијата ја имаат влошено работите за  изградба на една мини-хидроцентрала. Предизвикано е значително оштетување со кое се отежнува нормалниот тек на сообраќајот на оваа делница”, рече Таравари посочувајќи дека со увидот се утврдило дека како последица на градежните работи се создал теснец во водотекот по должината на патот што води кон селото и асфалтот не можел да го издржи притисокот од водата.

“Наскоро ќе се изготви записник со кој точно ќе се утврди причината и висината на штетата и ќе се побара од инвеститорот да ги отстрани последиците, нормално и со наша поддршка како општинската администрација. Значи, ќе бидат преземени брзи и конкретни чекори за надминување на состојбата”, нагласи градоначалникот.