Турците најбројни странски туристи во Македонија

Според податоците на Државниот завод за статистика, во април 2018 година во Македонија имало вкупно 82 635 туристи кои оствариле 164 183 ноќевања. Бројот на туристите во април годинава во однос на истиот месец лани е зголемен за 21.4 %, а бројот на ноќевањата е зголемен за 17.2 %.

Заводот објави дека бројот на домашните туристи е зголемен за 12.3 %, додека бројот на
странските е зголемен за 25.5 %.

Странските туристи при посетата на нашата земја, најчесто отседнуваат во полуксузните хотели.   Над 14.500 странци уживале во хотели до пет ѕвезди, додека над 30.500 од нив во хотели со четири ѕвезди. Имало такви кои кампувале, но нивниот број е далеку помал и изнесува 76.

Македонија во април ја посетиле околу 59 илјади странски туристи од различни земји и делови на светот. Најбројни се од Турција, од каде дошле 13.385 туристи. Следуваат Бугарија, Грција, Германија, Косово, Словенија.