Училишните дворови во Гостивар ќе се уредуваат со зеленило

Гостиварското Јавно претпријатие за паркинзи и зеленило, започна акција за хортикултурно уредување на дворните површини на училиштата и градинките. Активностите стартуваа од дворовите на основните училишта во селата Вруток и Равен, а според најавите ќе продолжат и во сите други градски и селски училишта и градинки.

“Вршиме нивелизација на земјата, садиме трева и украсни садници отпорни на климатските услови во секој период од годината. Ова е минимумот што мора да го направиме за децата кои се иднината на нашето општество. Акцијата се спроведува во овој период, бидејќи есента е најпогодното годишно време за садење”, вели директорот на ЈП ” Јавни паркиралишта и зеленило “, Музафер Зулбеари.

Периодов во тек е и хортикултурното уредување на големиот градски парк, кој ќе се поднови со 170 садници.