Заладување – Од утре треба да проработи парното греење низ гостиварските училишта

Топлото време што владееше до сега, го одложи почетокот на грејната сезона во гостиварските училишта, која вообичаено стартува од 15 октомври. Сепак, веќе е најавено значително заладување и спуштање на температурите, што значи дека од утре (22 октомври) ќе биде неопходно училниците да се затоплуваат. Училишните управи велат дека изминатиот период ги извршиле техничките подготовки и не очекуваат проблеми со греењето.

Гимназијата освен за обезбедување на греење на својот објект, е одговорна и за медицинското и економското училиште, со кои има заеднички систем.

„Техничката служба ги изврши сите подготовки, навреме поднесовме барање до општината за потребните количини нафта, веќе е доставена првата тура и сметам дека грејната сезона ќе почне без проблеми“, изјава Џези Камбери, директор на гимназијата во Гостивар.

Неколку гостиварски училишта грејната сезона ќе ја започнат со резервните количини на нафта, кои им останале од минатата година.

На подрачјето на општина Гостивар има 11 основни централни училишта со 20 подрачни како и четири јавни средни школи. Најголемиот дел од нив се затоплуваат со парно на нафта, додека дрва за огрев користат неколку низ селата.