Верни на традицијата-ГАКУД „Браќа Ѓиноски“ со Велигденски концерт во четврток

Гостиварското градско аматерско културно-уметничко друштво „Браќа Ѓиноски“ ги прави последните подготовки за традиционалниот Велигденски концерт, што го одржува секоја година пред големиот христијански празник на Христовото воскресение. Концертот е закажан за четврток (25-ти април) во Центарот за култура „АСНОМ“ во Гостивар со почеток во 19 часот.

„Велигденскиот концерт е традиција што ја негуваме повеќе од 30 години и на која остануваме верни и понатаму. Чест и задоволство ни е да и‘ пружиме на домашната публика претпразнично дружење преку фолклорот и народната македонска песна.“, велат од друштвото.

Како специјални гости на концертот се најавени членовите на КУД „Електропорцелан” од Аранѓеловац, Србија, кои за прв пат ќе настапат во Гостивар.

Публиката во четврток ќе има можност да ужива во целовечерна програма исполнета со сплетови на народни ора и песни, во изведба на фолклорната секција, оркестарот, најмалите членови на друштвото, како и вокалните солисти.