Во Гостивар одбележани 19 години од убиството на резервистите Александар и Даил

Се навршуваат деветнаесет години од трагичното загинување на полициските резервисти, Даил Јанкоски и Александар Николиќ од Гостивар. Годишнината беше одбележана со пригоден комеморативен собир на влезот во гостиварската населба Циглана, на местото кадешто беа убиени. Во нивна слава родини, пријатели, колеги од Одделението за внатрешни работи Гостивар положија буќети цвеќе, запалија свеќи и со минута молчење им оддадоа почит.

По комеморативниот собир во Циглана, блиските ги посетија и нивните вечни почивалишта.

Гостиварците Јанкоски и Николиќ, беа убиени на должност на полициски пункт на влезот од населбата Циглана во 2002 година на 26 август еден часот по полноќ. На нив пукале непознати лица со автоматски пушки од возило во движење со странски регистарски таблички.

На местото на трагедијата во чест на загинатите резервисти во 2012 година беше поставена спомен плоча.