2МФЛ: ФК Гостивар го шокираше Вардар совладувајќи го 2-1

Во 22.коло во Втората фудбалска лига – Запад на Градскиот стадион во Гостивар денеска гостуваше најтрофејниот фудбалски клуб во земјава, некогаш големиот, денес просечен второлигашки клуб ФК Вардар.

За ФК Гостивар резултатски не толку важен дуел, гостиварци од поодамна ги загубија шансите за влез во Првата лига, но желбата да се запише победа против најтрофејниот фудбалски клуб во земјава секогаш е присутна. За „црвено-црните“ ова беше натпревар кој не смееа да го загубат во трката за второто место на табелата.

Натпреварот започна отворено, со по еден поништен гол на двете страни. Во 9.минута од натпреварот крилниот напаѓач на Вардар, Бенјамин Демир им донесе водство на гостите од Скопје од 0-1.

Следуваше изедначена борба пред се на средината на теренот без посериозни шанси на двете страни, се до 45. минута кога по еден дуел во шеснаесетникот на Вардар судијата покажа на белата точка, на што гостинските играчи бурно реагираа на одлуката.

Хусеин Демири беше прецизен од 11 метри, на паузата се замина со резултат 1-1.

Во вториот дел, гостите од Скопје тргнаа на се или ништо, во 46.минта следуваше уште една спорна одлука на судиите, кога беше прекината полуконтра на гостите поради офсајд, а во шеснаестникот на домаќините 20 метри понапред лежеше играч на Гостивар, по што следеше уште една бурна реакција на играчите на Вардар кон помошникот кој го крена знаменцето во дадената ситуација.

Иако, победата им беше повеќе потребна на вардарци, како одминуваше времето така домаќините ја преземаа иницијативата на теренот. Во судиското продолжение следуваше канонада на голот на гостите, Филип Гачевски со серија фантастични одбрани спречуваше пораз за вардарци, но капитулираше во 94.минута кога Ринор Ајдини погоди за голема радост на домаќините и победа од 2-1.

Со овој пораз ФК Вардар направи голем чекор назад во трката за пласман во Првата лига, ФК Гостивар ја запиша 7 победа за сигурно 5.место на табелата. До крајот на првенството остануваат уште 6 кола.