90.000 квадратни метри за 1.111 евра во Врапчиште – Објавен нов оглас за закуп на земјоделско земјиште

Објавен е јавен оглас за давање во закуп над три хектари државно земјоделско земјиште, соопшти денеска ресорниот министер Љупчо Николовски.

Станува збор за 1.420 хектари, односно вкупно 23 парцели во 13 региони: Штип, Гостивар, Гевгелија, Куманово, Неготино, Велес, Ресен, Свети Николе, Валандово, Гази Баба, Кратово, Берово и Струга.

Во гостиварскиот регион земјиштето кое се нуди во огласот, се наоѓа во катастарска парцела Врапчиште. Со површина од 9 хектари, наменето за „Подигање на долгогодишни насади и изградба на објект за примарна обработка на земјоделски производи – кланички капацитети“. Почетна цена за целото земјиште е 1.111 евра.

Право на учество на јавниот оглас имаат домашни физички и правни лица и странски правни лица. Физичките лица треба да се регистрирани вршители на земјоделска дејност и/или запишани во единствениот регистар на земјоделски стопанства и/или да се трговец поединец на кои земјоделското производство или преработката на примарни земјоделски производи им е претежна дејност.

Огласот е денеска објавен во „Службен весник“ и ќе трае наредните 30 дена. Ќе се реализира преку електронско јавно наддавање.

Целиот оглас може да го погледнете тука.