Сообраќајна култура за основци во Гостивар и Тетово

Секторот за внатрешни работи Тетово денеска (10 октомври) започна со практична имплементација на новиот превентивно-едукативен проект„ Сообраќајна култура и младите во сообраќајот“, чиј носител е Отсекот за превенција. Со проектот ќе бидат опфатени ученици во деветто одделение во над 60 основни училишта на тетовско-гостиварското подрачје, а кои следат настава на македонски, албански и турски јазик.

„Стручно обучени полициски службеници овој и наредните два месеци, колку се планира да трае проектот, на посебни часови поблиску ќе ги запознаат највозрасните основци со сообраќајните знаци, како правилно да се движат по патишта и улици на кои нема обликувани тротоари, како безбедно да управуваат електрични тротинети, а ќе бидат информирани и за законските импликации за непостапување според важечките сообраќајни правила и прописи. Покрај ова, на деветтодделенците ќе им бидат презентирани и други информации поврзани со основните сообраќајни поими и начини на однсување како мотоциклисти, пешаци и слично.“, соопшти СВР

Целта на проектот е подигнување на нивото на сообраќајна култура на младите во функција на подобрување на вкупната безбедност на патиштата и улиците во поширокиот Полошки регион.