По пеколно жешкиот ден, од вечерва следува освежување

Неколку дена наназад во Македонија владеат многу високи температури и високо УВ зрачење, штетни за здравјето. Според она што го најавуваат метеоролозите, граѓаните ќе треба да ги издржат пеколните жештини уште денес, а од вечерва веќе ќе следува освежување.

Промената на временските прилики ја најавија од Управата за хидрометеоролошки работи. Нивните прогнози велат дека од попладневните часови ќе започне да дува северозападен ветер, кој долж Повардарието ќе се засилува и температурите ќе опаднат. Во делови од земјата ќе се создадат услови за краткотраен дожд.

Сосема поинаква слика ќе владее за време на викендот. Нестабилноста започнува од петок попладне, а ќе трае и во сабота. Најавени се пороен дожд, грмежи, засилен ветер и посвежо време. Во недела има стабилизација и температури околу 30 степени.