Поетско читање во Гостивар, гимназијалците во слава на пишаната реч и со почит кон стиховите

Со интерпретација на стихови создадени од безвременски поетски пера во придружба на звуци на гитара, гостиварската гимназија го одбележа Светскиот ден на поезијата, 21 март. Учениците потсетија на многу антологиски песни од признати автори од македонската и светската книжевна сцена, кои оставиле траен белег во кулутрното воздигнување.

Настанот беше организиран во мултикултурен дух со учество на гимназијалците од трите наставни јазици, македонски, албански и турски, а се читаше поезија и на англиски и француски јазик.

„Денес сме тука да и оддадеме почит на уметноста која ги премостува разликите и го обогатува човековиот дух, а тоа е поезијата. Ова е ден кога ја славиме моќта на зборовите кои можат да го изразат сето она што често останува неизречено, да ги допрат најдлабоките катчиња на нашите срца и да не поттикнат на размислување. Да се потсетиме на величината на поетите кои со своите зборови го обликуваа нашето разбирање на светот. Со читање на нивните стихови, да се инспирираме, да создаваме, да сонуваме, и да се изразуваме со иста страст и искреност.“, истакна професорката по македонски јазик и претседател на активот, Жаклина Ѓорѓиоска.

Поезијата е длабок израз на човековиот ум и универзална уметност, поетот во стиховите слободно може да дише и да живее како што сака, зборовите во поезијата освен што значат нешто, тие постојат и како битие, порачаа средношколците.

Програмата на одбележувањето беше збогатена со музички дел.

Како што веќе пишувавме утрово 21 март е прогласен за Светски ден на поезијата.