Цело семејство завршило во болница по несреќа на патот Дебар-Маврови Анови

Околу 16 часот попладнево се случила сообраќајна несреќа на патот Дебар – Маврови Анови, кај бензинска станица во атарот на селото Ростуше. „Во несреќата учествувале „мерцедес“ со тетовска регистрација, што го управувал 46 годишен жител на Голема Речица и камион МАН исто така со тетовска регистрација, управуван од 43 годишно лице од селото Челопек. При тоа возачот на мерцедесот, неговата сопруга и четири малолетни деца кои биле во возилото, се здобиле со повреди“, информираше портпаролот на СВР Тетово, Марјан Јосифоски.

Повредените биле пренесени во дебарската болница, од каде децата ќе бидат префрлени на скопските клиники, мајката во клиниката во Тетово, а таткото ќе биде пуштен на домашно лекување. Поради увид на местото, патот Дебар-Маврови Анови беше целосно затворен за сообраќај неколку часа, а сега возилата се пропуштаа наизменично.