Манифестација „Боите на францускиот јазик“ во Гостивар

Францускиот јазик, традиција и култура вчера во Гостивар се славеа на заедничка манифестација која ги обедини франкофоните од регионот, но и други делови на Македонија. Гостивар по осми пат беше домаќин на настанот Франкофонија, која годинава се одржа под мотото „Боите на францускиот јазик“. Манифестацијата ја организира Здружението на професори по француски, заедно со Француската Алијанса од Тетово.

„Задоволство ни е што учествуваат ученици од училишта од регионот на Гостивар, Тетово, Дебар, Центар Жупа, Кичево, Врапчиште, а имаме гости и од Валандово. Многу сме среќи што францускиот јазик се промовира на едно високо ниво“, рече Шарлен Жув, директор на Француската Алијанса во Тетово.

На големата сцена во гостиварскиот Центар за култура, учениците настапија со  песни, игра, рецитации, драмски изведби на француски јазик.

Манифестацијата ја поддржаа Амбасадата на Франција во Македонија и  Францускиот Институт.

Македонија е полноправна членка на Меѓународната организација на франкофонијата од 2006-та година.