Изложба на Елизабета Наумческа – Бројна публика, воодушевувања и силни емоции

Ликовните дела на уметницата Елизабета Наумческа ги собраа вчеравечер гостиварци на едно место, во Центарот за култура АСНОМ во Гостивар, кадешто беше отворена нејзината самостојна изложба.

Беа изложени 24 слики, во два циклуса – мртва природа и портрети.

„Портетот или личноста е она што во секодјневието претрпува разни емоции од сето она што се случува околу нас, а тоа се забележува и во самите дела. Мртвата природа се дела со мотиви од народното творештво, кое секако никогаш не треба да се заборави и мора да се негува, но да се даде во некој поинаков момент, во посовремено живеење“, рече Наумческа на отворањето, која се заблагодари на големата посетеност нагласувајќи дека секогаш публиката е таа што го мотивира уметникот и го тера да создава.

За делата и творештвото на авторката, на свеченото отворање зборуваше професорот Решат Амети. „Првото нешто што секој ќе го забележи кај делата на Елизабета е тоа дека тие не „печат“ во око, туку напротив привлекуваат како некоја визуелна гравитациона сила. Нејзиното севкупно творештво е прекрасна уметност, која секако може и понатаму да се развива. Елизабета била честопати учесник на ликовната колонија во Гостивар и колегите првенствено се воодушевуваат на нејзиниот карактер и обично важи дека не може некој да биде добар уметник, без да е добар човек“, истакна Амети.

Елизабета Наумческа е родена 1973 година во Гостивар. Дипломирала на Факултетот за ликовна уметност во Скопје, отсек сликарство, во класата на проф. Родољуб Анастасов. Остварила две самостојни изложби и учесник е на повеќе колективни изложувања во земјава и странство. Десетина години поактивно е посветена на црковното сликарство и изработува дела со религиозна тематика. Работи како ликовен педагог во Гостивар.