Апел до моторџиите во Гостивар да возат според прописите

Затоплувањето на времето очекувано го зголемува бројот на мотоциклисти и велосипедисти во сообраќајот. Периодов се почесто можат да се сретнат по улиците и патиштата во Гостивар и гостиварско. Прашањето е колку ги почитуваат законските правила и прописи?

Секторот за внатрешни работи Тетово најави дека ќе ги интензивира контролните активности, во чие средиште ќе бидат овие учесници во сообраќајот. Од таму апелираа  до мотоциклистите да не управуваат без соодветна возачка дозвола, технички неисправни, мотоцикли со истечена регистрација или воопшто нерегистрирани.

„Им се советува, исто така, задолжително да ја користат законски предвидената заштитна опрема и пред се кациги, односно шлемови на главите, но и да ја прилагодат брзината според условите на патот. Во спротивно, сите недостатоци, односно прекршоци адекватно ќе се санкционираат, а мотоциклистите веднаш ќе се исклучуваат од сообраќај. Глобите за непочитување на овие апели и препораки се движат од 50 до 500 евра во денарска противвредност, зависно од видот на прекршокот.“, соопшти полицијата.

Пред неколку дена, млад гостиварец загина во несреќа на патот Равен-Вруток, управувајќи мотоцикл.