Полицајците ќе ги учат дечињата во гостиварските градинки за правилата во сообраќајот

Секторот за внатрешни работи ќе започне со реализација на превентивно-едукативен проект, насловен „Чекор по чекор“, чиј носител е Отсекот за превенција, во соработка со гостиварската и тетовската локална самоуправа.

Како што информираат од полицијата, проектот стартува во понеделник во детската градинка „Пролет“ во Гостивар. Предвидена е полчасовна  презентација, со слики и игри, на сообраќајни знаци, пешачки премини и крстосници. „Стручно обучени полициски службеници, со користење на аудио и видео средства и методи, ќе ги запознаат најмладите-што претставуваат сообраќајните знаци и како најбезбедно да ги преминуваат улиците.“, соопшти СВР.

Втората фаза од проектот планирана е во Тетово и ќе стартува на 8-ми април, додека целиот проект предвидено е да заврши до втората половина на идниот месец.