Патот Бунец-Леуново-Ниќифорово околу Мавровско Езеро ќе се прошири и асфалтира

Коловозот на патот околу Мавровското Езеро, од месноста Бунец, преку Леуново до селото Ниќифорово, од сегашните во просек 3,5 метри, ќе се прошири на 6 метри ширина. По делницата ќе биде поставен и нов асфалт.

Реконструкцијата на овој патен правец ја најави директорот на Јавното претпријатие за државни патишта, Зоран Китанов.

„Проектот за патот, којшто е во должина од 11 километри и со променлива ширина од 3 до 4 метри, се проектираше и ќе се реконструира со ширина од шест метри. Да биде налик на пат, по стандардите. Тоа е многу важен пат за овој регион и може да кажам дека имавме многу барања од граѓаните, патот конечно да се среди“’, изјави Китанов.

Директорот информираше дека следниот месец се планира да биде отворен тендерот, а работите на терен ќе се изведуваат согласно временските услови. Според него, проектот со сигурност целосно би се заокружил напролет.