Почна второто полугодие – ОУ „Гоце Делчев“ конечно со нов кров

По тринеделниот зимски распуст, учениците денес се вратија на училиште. Второто полугодие од оваа учебна година ОУ „Гоце Делчев“ во Гостивар го започна со нов покрив. Градежните активности на кровната конструкција се речиси целосно завршени. Отсега во училниците повеќе нема да тече вода, при врнежи на дожд и снег. Останато е уште да се уреди ботаничката градина, која е составен дел од проектот, но за тоа ќе се почекаат подобри временски услови.

„Второто полугодие во нашето училиште започнува во значително подобрени услови за работа. Имено, градежните работи коишто се за реконструкција на покривот се при крај, горниот дел е веќе покриен така што, оние стандардни проблеми коишто со години наназад ги имавме со протекување, веќе ги нема. Во делот на кровната градина која е предвидена со проектот, се очекува напролет да се засади зеленилото, со што целосно ќе се заокружат активностите.“, рече директорот на училиштето Сашо Шарески.

Новиот кров на училиштето е проект на Општина Гостивар и УНДП, со вкупна вредност од околу 300 илјади евра.

Во врска со стартот на второто полугодие, градоначалникот Арбен Таравари изјави дека наставата започнала навреме и во сите училишта на гостиварското подрачје е обезбедено греење. „Сите училишта имаат греење, се` е како што треба, ете и кровот на ОУ „Гоце Делчев“ е среден. Во ова полугодие планираме некои инвестиции низ училиштата кога временските услови ќе дозволат. Тоа е од она што е во наша надлежност. Инаку, остана проблемот со книгите и учениците Албанци стартуваат без учебници или со учебници кои имаат скандалозни содржини, а од друга страна Министерството пушта инспектори по училиштата во Гостивар.“, рече градоначалникот.