СВР Тетово: Земјоделците да не ги палат стрништата и сувата вегетација

Во поширокиот Полошки регион веќе започнаа првите подготовки за претстојната пролетна сеидба, поради што од скоро се чуствува и зголемена раздвиженост на нивите, на кои  интензивно се чистат отпадоците. При тоа, поединци ги палат стрништата и сувата вегетација ( трева, жбунови и слично ), најчесто без нивна непосредна контрола.

Токму затоа, Секторот за внатрешни работи Тетово  апелира до земјоделците, но и до сите други да бидат крајно внимателни ако се движат или работат во полето и посебно да не палат огнови, кои брзо можат да се прошират, особено ако времето е ветровито, но и најдиректно влијаат на аерозагадувањето.

Зашто, во спротивно ќе се соочат со ригорозни законски санкции, односно со соодветни поднесоци, со потсетување дека за предизвикување  пожар, намерно или од невнимание, предвидени се затворски казни од 6 месеци до 8 години, зависно од видот на пожарот и другите околности и последици.

Секторот за внатрешни работи Тетово презема координирани превентивно-контролни и други мерки, навреме да се пресретнат можните причини за пожари, а во наредниот период тие уште повеќе ќе бидат засилени.