МНР: Во регионите зафатени со корона во Италија има 23.000 наши граѓани, до сега никој од нив не е заболен

Министерството за надворешни работи соопшти дека, согласно информациите добиени од Генералниот конзулат на Република Северна Македонија во Венеција – Италија, до овој момент нема информација за наши граѓани кои се заболени од коронавирусот.

„Министерството за надворешни работи преку Амбасадата во Рим и Генералниот конзулат во Венеција, редовно ја следи состојбата на македонските државјани кои се наоѓаат во овој регион и остварува комуникација со надлежните италијански органи во врска со мерките што се преземаат за спречување на ширењето на коронавирусот. Министерството препорачува зголемени мерки на претпазливост при патување во италијанските региони Ломбардија, Венето и Емилија-Ромања во овој период.“, известија од Министерството.

 Во зафатените региони Ломбардија, Венето и Емилија-Ромања престојуваат околу 23.000 државјани на Република Македонија. Подетални информации околу развојот на состојбите, тие можат да добијат во Генералниот конзулат во Венеција на дежурниот телефонски број + 39 389 5837913 или е-маил venice@mfa.gov.mk

 Според последните информации, во Италија потврдени се 159 случаи на заразени лица со коронавирус.