Околу 2,7 милиони денари за асфалтирање на локален пат во гостиварско Дебреше

Во гостиварското село Дебреше започнаа работите за асфалтирање на локален пат, во должина од околу половина километар и ширина од 6 метри.

Проектот се реализира со средства обезбедени од општинскиот буџет на Гостивар, а вредноста изнесува околу 2,7 милиони денари.

„Ова е прва инвестиција асфалтирање на пат по Програмата на општината за годинава. Реализиравме асфалтирање и на патот од Симница до Церово, но тоа беше проект со меѓуопштинска соработка, а ова е целосно на Општина Гостивар. Ќе продолжиме со реализација на проекти, доцниме поради ситуацијата со Ковид 19, но се надевам дека натаму ќе се стабилизира состојбата, за да го сработиме сето она што сме го дале као ветување пред граѓаните“, рече градоначалникоит Арбен Таравари.

Во врска со работите на канализацијата во селото Чајле, кадешто работите се стопирани градоначалникот рече дека од Министерството за транспорт и врски има одобрение, но МВР дало забелешки и го вратило проектот назад.

„Никогаш до сега не се случило нешто што потпишал министерот за транспорт и врски, да се врати од страна на МВР. Но ете, во Гостивар тоа се случува, со забелешки дека немало предвидено светло, некоја сигнализација, а тоа се прави чисто како нарачка од некого да се спречи изградбата на канализација од Чајле. Веќе навикнати сме на такви пречки, но единствено што може да се случи е да се одолговлекува уште 10-тина дена, потоа работите ќе се продолжат“, изјави Таравари.