Заев во Гостивар: Во 6 ИЕ ќе ги победиме ДУИ, Алијанса, а од ВМРО ДПМНЕ ќе имаме двојно повеќе пратеници

Коалицијата „Можеме“ вечерва одржа граѓанска трибина во Гостивар, на која лидерот на СДСМ, Зоран Заев порача дека се убедени во победа на Парламентарни избори, заради својот концепт и храброст во донесувањето на одлуки.

„Гостивар и во најтешките денови за нашата мултиетничка бил пример на сплотеност и единство и денес сме уште поисправени од минатото да го потврдиме тој гостиварски дух на ниво на цела држава. Тоа е единстевн исправен модел кој може да не’ јакне на секој план и може да им гарантира на нашите деца посветла иднина. Покажавме дека не се сите политичари исти, ние носиме одлуки и имаме храброст. Ги слушам повторно ВМРО зборуваат за македонштината, ДУИ за албанштината. Ние имавме храброст, сите одлуки за кои се чукаа во градите големи Македонци и големи Албанци ги затворивме. Да ги прашам ДУИ зошто не го донесовте законот за јазиците 11 години кога бевте на власт со ВМРО, што ви фалеше? Затоа што немавме храброст, калкулиравте, требаше да дојде Заев и концептот едно општество за да го донесе законот. Мултиетнички Гостивар ќе победи, затоа што сме заедно, а тоа ниту еден од противниците го немаат како капацитет. Затоа во шеста изборна единица ќе го победиме ДУИ, ќе ги победиме Алијанса за Албанците и ќе имаме најмалку дупло повеќе пратеници од ВМРО“, истакна Заев.

Зборувајќи за она што го реализирале на чело на државата, тој ги спомена покачувањето на социјалната помош, минималната плата и платите во здравството и просветата, укинувањето на квотите за лекови, решавање на статусот на стечајците, членството во НАТО и друго.

„Покажавме дека водиме грижа за сите, најмногу за сиромашните, докажавме дека парите ги има во државата и можеме да ги враќаме. 10 милиони и 700 илјади евра вративме пари само од Мој ДДВ, денес 305 илјади граѓани скенираат фискални сметки и тие се наши проширени испектори кои придонесуваат да се издаваат фискални сметки. Ги исполнивме нашите стратешки цели, успеавме да добиеме одлука за почеток на преговорите со ЕУ после 15 години чекање како земја кандидат, а НАТО членството е траен мир, вечна безбедност. Вистинки партиот е тој што ги расте платите, што вработува, ги пушта парите кај граѓаните назад, тоа сме ние, другите се кукавици што се кријат зад картата на национализмот. 21 век сме, треба ли да се докажуваме кој е поголем Македонец или Албанец, не, треба да одиме напред“, рече Заев.

Во своето обраќање кандидатот за пратеник од Гостивар, Драгољуб Филипоски нагласи: „Патриотизам е да гледаш среќен народ, задоволни граѓани кои својата иднина ја гледаат дома, држава која нуди можности за своите граѓани подеднакво без оглед на меѓусебните разлики. Патриотизам е македонскиот јазик во семејството на Обединетите Нации, македонското знаме во семејството на НАТО алијансата. Изминатите две и полгодини Владата предводена од СДСМ и Зоран Заев докажа дека може да ја изведе државата на прав пат. Затоа од тука, од мултиетничко Гостивар ја испраќаме пораката дека она што го започнавме ќе го направиме уште подобро, уште повеќе“.

На трибината зборуваа и кандидатите за пратеници од коалицијата во ИЕ 6, Фаница Николоска и Илјас Бејџан.