Честит Илинден – празнуваме датум со значаен белег во историјата

Во Македонија денес се слави големиот национален празник Денот на Републиката, Илинден, 2 август – датум кој има значаен белег во македонската историја. Се одбележуваат два историски Илиндена – 117 години од почетокот на Илинденското востание и 76 години од Првото заседание на АСНОМ.

Во 1903 година на полноќ спроти 2 август, започнало Илинденското востание во Крушево. Востаниците го ослободиле градот, а по два дена Никола Карев ја прогласил Крушевската Република и станал нејзин претседател. Слободната Крушевска Република траела десет дена. Бројната османлиска војска тргнала во акција за враќање на власта во Крушево. Последните истрели на Мечкин Камен и загинувањето на војводата Питу Гули, го означиле и крајот на Крушевската Република.

Во 1944 година, во манастирот Св. Прохор Пчински кај Куманово одржано е Првото заседание на АСНОМ (Антифашистичкото собрание на народното ослободување на Македонија), на кое е потврдена општествено-правната положба на Македонија како рамноправна федерална држава во рамките на Југославија. Избран бил Президиум на АСНОМ, под претседателство на Методија Андонов-Ченто.

Заседанието усвоило неколку документи со државнотворно значење, меѓу кои и Решението за воведување на македонскиот јазик за службен јазик во македонската држава и Декларацијата за основните права на човекот и граѓанинот на демократска Македонија.