Вработувања и унапредувања според професионалност, а не по партиска линија – велат од Општина Гостивар

Изменет и дополнет е Планот за вработувања на Општина Гостивар за оваа година. Наместо првичните 45, бројот на нови вработувања е 58. Нови административци добиваат повеќе сектори и одделенија, а значителен дел од вработувањата се во Противпожарната единица.

Од локалната самоуправа објаснуваат дека потребата за промени произлегла од актуелните состојби со изборите и коронавирусот.

„Планот за вработувања во 2020-та беше усвоен уште од лани, но изборите беа предвидени прво во април, па се случи и пандемијата со ковид, па се сменија состојбите. Мораме да надополниме со работници, особено во противпожарната единица.“, појасни секретарот на општината Назми Јусуфи.

Подготвен е и усвоен и Планот за вработувањата во општината за 2021-ва година. И догодина се дава простор за нови административци, како и за унапредувања. Јусуфи вели дека одлуките ќе се носат строго според професионализамот и стручноста на кадарот.

„Законска обврска ни е до 1 септември да подготвиме План за вработување за идната година и да го доставиме во Министерството за финансии. Сакам да нагласам дека деградирања на работници ќе нема, туку само унапредувања. И тоа не по партиска или национална линија, туку само според професионалноста и извршувањето на работните задачи“, рече секретарот.