Во Гостивар се потрошиле 750 брзи ковид тестови, обезбедени се уште 2.000

Во лабораторијата на Здравствениот дом во Гостивар од втората половина на ноември до сега, направени со вкупно 750 брзи ковид тестови. Тестирањето се спроведува во посебни термини определени само за таа намена, закажувањето оди преку матичните лекари, според симптомите на пациентите, а услови е тие да не траеле подолго од 5 дена. Чекање нема, односно наутро веќе може да се најде термин за тест за истиот ден, а резултатите се добиваат за половина час.

Екипите на Здравствениот дом продолжуваат да земаат брисеви и да испитуваат присуство на корона на овој начин, и во наредниот период.

„Откако беа воведени кај нас брзите тестови, имаме бројка од направени 750. Обезбедени се тестови и за наредниот период преку Министерството за здравство, и располагаме со уште 2.000 брзи тестови. Се надевам дека овој континуитет ќе биде запазен и понатаму, се додека имаме проблем со постоечката пандемија.“, вели д-р Абдулкадар Алији, раководител на лабораторија-Здравствен дом Гостивар 

Последните дваесетина дена, со стишувањето на коронавирусот, темпото на тестирање е намалено. Ако претходно имаше 25 до 30 пациенти дневно, сега оваа бројка е петнаесетина. Паѓа и процентот на позитивни од тестирани. Актуелно се добиваат од 15 до 20% позитивни резултати за разлика од претходно кога речиси секој втор тест беше позитивен

„Тестирањето од почетокот на оваа година се одвива непречено, со исклучок на неработни и празнични денови, а имаме опаднат тренд споредено со минатата година. Може да констатираме дека се користи 60 до 65% од капацитетот,  значи толкавата е и потребата. И пациентите кои се обраќаат за преглед кај матичните лекари се најверојатно толку, оние кои имаат симптоми на сезонски грип или коронавирус. Како што е и во целата држава и кај нас е карактеристично пад на бројката на позитивни резултати. Изминативе 2-3 недели се движи од 15 до 20%. Ова се поклопува со епидемиолошката слика на подрачјето на Гостивар, а и во целата држава.“, наведува д-р Алији.

Брзите ковид тестови се бесплатни за пациентите. Со нив се овозможува поефикасно регистрирање на позитивните случаи и нивно навремено третирање и изолирање од околината, што е најважно во спречување на ширење на вирусот.