Од вечерва до вторник полициски час од полноќ до 4 наутро

Ноќеска немаше ограничување на движењето за граѓаните поради муслиманскиот празник Рамазан Бајрам, а од вечерва полицискиот час се враќа на сила, но во скратена форма. Ќе почнува на полноќ и ќе трае до 4 часот наутро. Ваквото ограничување за сега важи до вторник, 18 мај. Дали ќе продолжи или ќе се менува, ќе зависи од препораките и одлуката на надлежните по викендов.

Од вчера дозволено работно време за угостителските објекти е 23:30 часот и тоа само во отворените делови – терасите.

Исто така со последното олабавување на мерките престана да важи мерката за забрана за посетители – гости во сите вежбалници, фитнес клубови, спортски центри и сали наменети за вежбање, во затворен простор, како и во игротеките, но работата во овие објекти задолжително треба да се одвива според протоколите за работа.

Се даде зелено светло сите настани и други слични јавни активности (културни, научни и забавни) да продолжат да се одржуваат согласно наменските протоколи до 30 % исполнетост на капацитетите во внатрешноста на објектите и до 50 % исполнетост на отворените простори.

Спортските настани и натаму треба да се организираат без физичко присуство на публика.