Приливите од печалбарите намалени поради пандемијата

Печалбарите лани испраќале помалку пари кај своите семејства во земјава, што е резултат на ковид пандемијата. Народна банка за минатата година бележи пад на дознаките од странство за околу една четвртина.

Гувернерката Анита Ангелоска Бежоска изјави дека поконкретно тоа се должи на финансиската криза што го погоди целиот свет поради коронавирусот, како и рестриктивните мерки и ограничувања.

„Согласно со нашите очекувања, но и очекувањата на меѓународните финасиски институции во глобални рамки, дојде до пад односно забавување на приватните трансфери во услови на пандемијата. Секако тоа се случи и кај нас. Минатата година забележавме пад од околу 24 % на дознаките од нашите иселеници, а главните причини може да се лоцираат во два пункта: прво пандемијата која секако ги погодува синхронизирано сите економии, пазарите на труд, го намалува и расположливиот доход на нашите иселеници и оттаму можноста и капацитетот на испраќање на дознаки и второ рестрикциите во делот на мобилноста, што е всушност видливо кога ќе се погледне самата структура на приливите по основ на дознаките. За оваа година по падот имаме постепено стабилизирање на износот на дознаките, но и  не очекуваме дека тие оваа година ќе се вратат на преткризното ниво“, рече Ангелоска Бежоска.

Минатата година поретки беа и посетите и престојот на печалбарите во родниот крај, поради што трговците претрпеа финансиски загуби.