Дорина чоколадо со необичен додаток – чварки

Хрватската компанија „Краш“ пред неколку дена објави дека произвела ограничена серија чоколади со посебен додаток – чварки.

Речиси сите корисници на социјалните мрежи останале во неверување и чудење кога ја прочитале оваа вест, сметајќи дека не е вистинска. Но, компанијата „Краш“ ги демантираше сите и одговори дека не е шега.

Една од објавите на Фејсбук страницата на компанијата гласи:

„Веќе не мора да замислувате каков вкус би имало чоколадото со чварки, сега можете да го пробате! Да, добро слушнавте, направено е крцкаво чоколадо со чварки, а за тоа е задолжена компанијата Краш, која реши да ги изненади сите оние кои се „шегуваа“ да воведат ваков тип на чоколади. “

Оваа комбинација првпат се споменала на 1 април, на шега, но сега од компанијата истакнаа дека интересот и бројот на позитивни коментари бил толку голем што навистина решиле да ја реализираат идејата. Поточно „шегата“.

„Дорина Чварак“ е направена од 100 грама, со минимум 50 проценти какао и внимателно одбрани крцкави чварки.

Необичната комбинација на вкусови е направена рачно и во ограничена серија, а овие чоколади нема да се најдат во редовна продажба во маркетите, туку само во продавницата на Краш во Загреб.