Асаф Адеми: БЕСА ќе води позитивна кампања на изборите

Движењето БЕСА вечерва пред членството и јавноста официјално го претстави Асаф Адеми како свој кандидат за градоначалник на општина Гостивар на Локалните избори 2017. Настанот воедно означи и официјално отворање на Изборниот штаб на партијата.

Во своето обраќање Адеми нагласи дека ќе водат позитивна кампања, без навреди кон противниците и дека нема да се занимаваат со другите политички партии. Тој пред членството и симпатизерите во седиштето на партијата во Гостивар, зборуваше за приоритетите во нивната изборна програма.

„Ќе се фокусираме на отворање на нови работни места, на подобрување на условите во училиштата кои се во катастрофална состојба, на инвестиции во инфраструктурата, а планираме и отворање на голем современ спортско-рекреативен центар. Предвидуваме изградба на пречистителна станица за фекални води и гасификација на Гостивар за што веќе сме имале контакти со одредена компанија“, рече Адеми.

Носителот на листата за советници од БЕСА, Арафат Шабани ги претстави имињата кои ќе се најдат на листата за членови на Советот на општината. „Прво треба да го ослободиме Гостивар, па да го развиваме, никој друг не може тоа да го направи за нас, туку само самите ние“, нагласи Шабани.

Свое обраќање вечерва имаа и шефот на изборниот штаб на БЕСА, Имерли Асани и пратеникот Фадиљ Зендели.