Таравари: Ако гостиварци не ми веруваат, се враќам на лекарската професија

Министерот за здравство во заминување,  Арбен Таравари кој на Локалните избори влегува во трка за градоначалник на Гостивар  во неделното интервју на Радио Слободна Европа меѓу другото зборува и за својата кандидатура.

„ Ние направивме проценки според одредени сондажи, одредени анкети за рејтинг и видовме дека доколку не направиме соработка со ниедна друга партија, единствениот којшто е над господинот Бејта сум јас. Мислам дека оваа одлука е релативно добра, затоа што ако гледаме долгорочно, нам како партија ни е многу битно на овие избори да пораснеме како партија, да не останеме на 36 илјади гласови, туку да одиме, нашите тенденции се за над 50 илјади гласови. Дали ќе ми веруваат граѓаните на Гостивар? Јас имам 45 години и таму живеам 45 години. Секое семејство ќе каже дека се чесни, меѓутоа моето е меѓу подобрите семејства во Гостивар. На крајот на краиштата, јас никогаш не сум излегол во Гостивар да барам гласови. Сега е моментот да видам колку тежам и вредам во мојот град. Ако тие ми веруваат и ми дадат гласови, ќе знам дека вредам во политиката. Ако не ми дадат гласови и мислат дека не треба да продолжам во политиката, јас си имам златен занает, невролог, релативно добар, не најдобар, ќе си ја продолжам мојата работа, ќе си го продолжам животот со семејството, на кое му недостигам во последните месеци, па и години откако сум во политиката.“, вели Таравари.

Тој во НЕДЕЛНОТО ИНТЕРВЈУ одговара и на прашања поврзани со функционирањето на Министерството за здравство, смртноста на доенчињата и др.