Дебата во Гостивар: Можат ли жените да се обединат без оглед на политичката припадност?

Потребни се повеќе жени на одлучувачки позиции, обединување на жените во борбата за женски права, без оглед на нивната политичка определба и креирање на родово балансирани буџети. Ова беа дел од поентите произнесени на синоќешната дебата, која се одржа во Гостивар, по повод Меѓународниот Ден на жената, 8 Март.

Своите ставови и мислења на теми врзани со родовата рамноправност, положбата на жената во општеството, унапредувањето на позицијата на жените, машките гледишта на еднаквоста и слично,  ги искажаа Соња Дамјановска и Номза Шаќири, советнички во Советот на Гостивар и Блерита Мустафаи Мазлами, претставник на граѓански сектор.

„Родовата рамноправност бара еден системски пристап за да има вистински резултати. Почнувајќи од училиштата, треба да се образоваат родово сензитивни деца, потоа институциите да воведуваат мерки што ќе стимулираат жени кои ќе работат на своите права, да се издвојуваат буџети во општините за поттикнување на повеќе жени во бизнисот, спортот и така натаму.“, рече Дамјановска.

Во Советот на општина Гостивар жените се застапени со 30%, што според Шаќири не е доволно.

„Како жена Советник во општина Гостивар, не сум задоволна со квотите што се поставени за жените. Во Советот сме само 30% жени, а веќе во некои од партиите како што е и Алијанса за Албанците учеството на жената е 40%. Потребни се повеќе припаднички на женскиот пол на одлучувачки позиции, а не само да бидат во улога на набљудувачи“, изјави Шаќири.

Професорката Мазлами, која води невладина организација за женски права, меѓу другото нагласи дека во напорите на жената да биде успешна во работата и да напредува,  неопходна е поддршката од мажот и семејството. „Не само декларативна поддршка, туку вистинска, што подразбира мажот да се вклучи во обврските дома, затоа што жената не може сама се да постигне. Кај нас, се уште владее патријархалност, 63% од жените се домаќинки, а мажите чекаат сите работи во домот да ги заврши жената“, рече Мазлами.

Во однос на тоа, дали жените можат да ги надминат политичките разлики и да настапуваат заеднички кога се работи за родовата еднаквост, учесничките се сложија дека тоа е неопходно и дека се подготвени на таков чекор. Сепак, во дискусијата што се разви, околу поддршката на проекти, буџетирањето, комисијата за родова еднаквост можеше да се забележи дека жените во голема мера ги бранат партиските политики и убедувања.

Дебатата „Ајде да зборуваме за жените“, во Гостивар ја организираа невладините OYA  и Democracy Lab