Децата со попречености од Гостивар твореа на арт симпозиум – „Заедно можеме“ и „Силиндарт“ соработка

Членовите на Здружението на лица со посебни потреби „Заедно Можеме“ од Гостивар, беа дел од четвртото издание на Меѓунардониот симпозиум на уметноста „Струга 2020“, во организација на Здружението за уметност и култура “Силиндарт“ – Гостивар.

Дваесетина дечиња со посебни потреби, твореа уметнички дела со помош на уметниците, учесници на Симпозиумот.

“Со задоволство се одзвавме на  поканата на претседателот на Здружението “Силиндарт“ – Бурхан Ахмети, за нашите членови, речиси сите деца, да учествуваат на овој толку значаен културен настан и да ја вкусат уметноста и културните настани исто како сите. Делата кои ги создадоа на овој Симпозиум, ќе ги презентираме пред јавноста на некој друг пригоден настан“, вели Шпенди Салија, претседател на Здружението “Заедно можеме“.

Симпозиумот се организира 4-ти пат по ред, а ова е прво издание во кое учествуваат лица со посебни потреби.

„Сметаме дека покрај другите активности како што се уметнички настапи, мурални слики 3Д, поетска вечер и завршна изложба, еден ден од овој симпозиум да го издвоиме за лица со посебни потреби. И радоста на овие деца, но и нашето задоволство додека работевме со нив, не убедија дека не згрешивме и планираме на сите наредни изданија да организираме ваков настан, бидејќи цениме дека нивната социјализација и учество во културно-уметнички активности, е скапоцено за целото општество“, изјави Бурхан Ахмети, претседател на “Силиндарт“.

Организаторите, на учесниците им доделија Сертификати за учество, а претседателите на двете здруженија, разменија Признанија за дадениот придонес.