D`reamers на гостиварците Јордан и Синиша со нова песна и спот – „Милион зборови“

“Милион зборови” е новата песна на гостиварците Јордан Џејмс Ивановски и Синиша Карафилоски во нивниот заеднички проект D’Reamers, која ја промовираа со видео запис. Безвременската балада ќе им се залепи за срце на слушателите од 7 до 77 години, а  претставува спој од класичен ритам преку современ текст до совршена и модерна видео и аудио продукција.

Аранжманот и звучната продукција се снимени во GreenRoom Sound Studio-то на Дамир Пух и Наташа Миха, додека видео продукцијата е на ProCam Studio на гостиварецот Небојша Петревски.

„Милион зборови е едноставно, секојдневно, реално но и совршено музичко дело во која ќе се пронајдат сите лица, без разлика на нивната возраст. Тоа претставува збир на искрени, симпатични, на моменти и прикриени, двосмислени чувства кои сите нас не тера да си ставиме прст на чело и да ја согледаме реалноста околу нас. Значајно за оваа песна е што покрај совршената композиција и дело во самиот спот се јавува и прекрасната Рената која внесе дух во видео записот и претставува главниот протагонист на ова остварување“,  изјавија Јордан и Синиша.

Милион зборови е втора песна на D’Reamers. Првата, со наслов Карма ја промовираа во март годинава.